CEBU, Philippines - Nabalian sa bukton ang usa ka tawo human modasmag ang usa ka 10 wheeler truck nga iyang gisakyan ngadto sa laing duha ka sakyanan nga maoy nakapabara sa dagan sa trapiko sulod sa 30 minutos didto sa N. Bacalso Avenue , barangay Lawaan I, dakbayan sa Talisay kagahapon sa alas 7:45 sa buntag.
Ang biktima mao si Bernardo Villaver, 44-anyos taga barangay Subangdaku dakbayan sa Mandaue, helper ni Celso Aluta, 61, ang drayber sa nahisgutang truck nga taga barangay Tayud, lungsod sa Lilo-an.
Si PO2 Amelito Hornales sa Talisay City Traffic Division nga nahinabi sa Banat News kagahapon nagkanayon nga si Aluta nagbiyahe gikan sa dakbayan sa Sugbo paingon ngadto sa habagatan. Apan pag-abot sa lugar nga nahitaboan, giingong mihungaw ang preno sa 10 wheeler nga sakyanan ni Aluta hinungdang wala na makontrolar niya ang dagan niini.
Gidaro niini ang dump truck nga gimaneho ni Sacarias Villejo, 45 nga taga barangay Jaclupan dakbayan sa Talisay.
Human mobangga sa dump truck , ang sakyanan ni Aluta padayong mibadhas sa pikas lane ug didto nasabak na usab ang simod sa armored car sa Dasia Security Agency nga gimaneho ni Richard Anthony Borasa, 27, taga barangay Quiot, Pardo, dakbayan sa Sugbo. Si Aluta nagpahayahay na sa prisohan human sa maong hitabo. (BANAT NEWS)