CEBU, Philippines - Nahabwa ang ginhawaan sa usa ka 60-anyos nga mag-uuma human nag-unay og dinunggabay sa iyang kaubang mag-uuma tungod sa kahubog sa dihang paingon na unta silang mamauli gikan sa kasal sa ilang higala sa bukirang bahin sa lungsod sa San Fernando niadtong Huwebes sa alas 3:30 sa hapon.
Ang biktima mao si Eugenio Causapin, 60, nagpuyo sa nahisgutang lugar samtang ang suspek mao ra ang iyang higala ug silingan nga si Alejandro Parba, 68.
Matud pa ni Insp. Carlos Reyes Jr., hepe sa San Fernando Police dihang nahinabi sa Banat News, ang biktima ug suspek gikan sa kasal sa anak sa ilang higala ug pulos nangahubog ug dungan nga namauli.
Apan matod sa mga nakasaksi namatikdan nila ang biktima ug suspek nga samtang naglakaw nagkalalis ang duha ug nadunggaban ang biktima.
Bisan og samaron na nakahimo pa kini og punit og bato ug gihapak ang ulo sa suspek hinungdan nga kini naangol usab apan namatay ang biktima. (BANAT NEWS)