CEBU, Philippines - Tulo ka mga suspetsadong kawatan usa niini notado na kaayo, nagtingkagol karon sa Talisay City detention cell human sila masikop sa kapolisan didto sa barangay Pooc, sa maong dakbayan kagahapon sa buntag.
Ang mga nasikop mao si Geronimo Resuena, 22, taga sitio Sunrise, barangay Pooc , Geronimo Cayanong, 18, ug Eliseo Bonutan, 27, nga pulos taga sitio Boromeo, barangay Pooc
Ang mga ulahing biktima nga gikawatan sa tulo mao sila si Venice Sharie, 20, taga barangay Lower Pakigne, Minglanilla ug Christine Siao, 21 taga barangay Tinaan, dakbayan sa Naga.
Ang pagpangawat nahitabo sa usa ka beach resort sa barangay Pooc niadtong Martes sa alas 11:00 sa gabii.
Ang tulo ka mga kawatan giingong mga armado og kutsilyo sa dihang nasikop ug nabawi usab sa kapolisan gikan kanila ang pitaka nga may sulod nga P1,000 nga kwarta, duha ka ATM card, tulo ka credit card ug driver’s license nga gipanag-iya sa laing biktima.
Ang kapolisan nagpahigayon og follow-up nga imbestigasyon aron ma-bawi ang Nokia 5300, Nokia 5130 ug Cherry Mobile nga mga cellphone nga gipanag-iya sa duha ka ulahing mga biktima.
Ang tulo positibong gitumbok sa tulo ka mga biktima nga maoy mikawat sa ilang mga butang. - (BANAT NEWS) )