CEBU, Philippines - Gisaulog ang ika-23rd Founding Anniversary sa 78th Infantry Batallion didto sa ilang headquarter sa lungsod sa Balamban nga mihandom sa bayanihong nahimo sa ilang sakop batok sa mga rebelde sa miaging adlaw.
Kini mao si Private first class Nen Joy Briones, nga lumad nga taga barangay Carre, Sulop Davao Del Sur.
Nasayran nga si Briones usa sa kagatosan ka mga sakop sa 78th IB nga gipadala sa Leyte aron mosuporta sa 19th Infantry Batallion sa padayong kampanya niini batok sa insurgency.
Apan imbis kalinaw ang tuyo-an sa maong grupo giingong nakahimamat kini og kagubot sa barangay Antipolo diin gibana-bana nga 50 ka kumunistang rebelde ang gikasangka sa sakop ni Briones.
Apan si Briones namatay sa maong sangka dihang nasabak sa bala ang suwang, liog , tuyong abaga ug tuong kamot.
Ang patay’ng lawas ni Briones kasamtangang gidala sa Ormoc aron maautopsihan ug kagahapon gipadala na nganhi sa Cebu aron anhi manukad paingon ngadto sa iyang yutang natawhan.
Ang commander sa 78th IB Lt. Col., Nolasco Mempin mibutyag nga gikasubo kaayo nila ang kamatayon ni Briones ug gipasalig niya sa pamilya niini nga madawat dayon ang death claim sa kamatayon ni Briones.
“Despite this, life must go on for his other comrades battalion,” pasabot pa ni Mempin.
Samtang si Lt. Col. Romeo Brawner, ang commander sa 2nd Special Forces Battalion mibutyag nga “ He (Briones) did not die in vain.”
Gawas niini, gipasidunggan usab si Private First Class Vicente Lopez human luwasa niya ang usa ka batang lalaki nga diriyot malumos sa usa ka kanal. - (BANAT NEWS)