CEBU, Philippines - Ang sinagop ni Mayor Socrates Fernandez sa dakbayan sa Talisay nga si Joavan Fernandez mi-plead not guilty kagahapon sa gipahigayong arraignment sa iyang kasong malicious mischief nga gipasaka ngadto sa korte sa kapolisan sa Talisay batok kaniya.
Atol sa arraignment kagahapon diha sa sala ni Municipal Trial Court in Cities (MTCC) Judge Mario Manayon sa dakbayan sa Talisay gimando sa maong huwes ang pre-trial karong Abril 7, 2011.
Ang maong kaso nga gipasaka sa kapolisan batok kang Joavan dihang giingong gibanggaan niini ang Innova Patrol car sa kapolisan gamit ang iyang Mitsubishi Pajero diha sa South Coastal Road eskina sa barangay San Roque niadtong buwan sa Oktubre 2010.
Gawas sa maong kaso, gisunod usab ang trial sa kasong grave threats nga gipasaka sa registered nurse nga si Vincent Castrodes batok kang Joavan.
Ang abogado ni Joavan nga si Atty. George Bragat mipahigayon og cross-examination ngadto kang PO1 Rusty Pelayo kinsa maoy usa sa miresponde dihang si Castrodes mitaho ngadto sa police station sa giingong pagpanion ni Joavan ngadto kaniya og pusil diha sa barangay Bulacao niadtong buwan sa Hunyo, 2010.
Si Pelayo mao usab ang searcher niadto dihang ang Big Horn nga sakyanan ni Joavan gisiksik kini ug nakuha sa likod nga bahin ang kalibre .45 nga pistola.
Si Bragat mihangyo kang Manayon nga i-uswag ang iyang pagpahigayon og cross-examination kang Pelayo tungod kay iyaha pang susihon ug ikumparar ang affidavit sa iyang kliyente ug sa polis ug himuon kini karong Mayo 17, 2011.
Niadtong Miyerkules si Joavan nag-inusarang miadto sa buhatan ni Regional Trial Court Judge Gilbert Moises sa Branch 18 ug mibutang og piyansa nga P100 mil sa kasong robbery nga gipasaka batok kaniya sa tindero sa tindahan ni Ederlinda Anderson sa club house sa Vista Grande subdivision sa barangay Bulacao nga si Raymond Paran.
Apan tungod sa pagdali-dali nga makalikay sa mga sakop sa media nakalimtan ni Joavan og pirma ang iyang release order. Apan dili palang dugay si Paran giingong milayas na tungod sa kahadlok ug nagbilin og suwat.
Kahinumduman usab nga ang mayor miangkon nga si Paran miluwat og affidavit of desistance ngadto kang Fiscal Nap Aburo sa dakbayan sa Naga. (EIM) (BANAT NEWS)