CEBU, Philippines - Gipusil patay ang usa ka 60-anyos nga lalaki sa giingong usa sa duha ka managsuon nga gikaatraso sa anak sa biktima diha sa duol sa ihawan sa North Reclamation Area sa sitio Mahusay sa barangay Mabolo ning siyudad sa Sugbu sa miaging hapon.
Ang biktima giila sa kapulisan nga mao si Pedro Arsolon, 60, molupyo sa nahisgutang lugar kinsa nakaangkon og samad pinusilan sa iyang dughan.
Samtang ang magsuong gitumbok nga namusil giila nga sila si Michael ug Edgar Macapas nga silingan sa biktima.
Subay sa pasiunang imbestigasyon sa kapulisan, natulog ang biktima apan nakamata kini tungod sa kasaba mugna ni Edgar nga giingong hubog ug nagdala og sundang nga nagsige’g pangita sa anak sa biktima nga ilang gikaatraso sa magsuong Macapas.
Gihangyo sa biktima nga mopauli lang una sa ilang panimalay si Edgar apan nagpalaban kini sa iyang igsuong si Michael ug wala magdugay mibalik ang managsuon nga nagdala na’g wala matinong kalibre sa armas ug gidiretso pagpusil ang biktima sa dughan.
Ang biktima gidala sa Vicente Sotto Memorial Medical Center (VSMMC) apan namatay kini.
Ang mga sakop sa Mobile Patrol Group (MPG) midakop ni Edgar apan si Michael nakaikyas. (/EIM) (BANAT NEWS)