CEBU, Philippines - Ang moretirong hepe sa Bureau of Fire and Penology (BFP) sa dakbayan sa Talisay nga si Felipe Canillas tanyagan sa siyudad nga mahimong usa sa mga consultant sa Disaster Risk Reduction Management Council (DRRMC).
Karong Hulyo 15, 2011 si Canillas kinsa magpanuigon usab og 56-anyos moretiro na sa serbisyo ug ang nahisgutan niyang pagretiro usa ka mandatory retirement.
Ang pilian nga mopuli kang Canillas mao si Superintendent Virgenia Toledo, hepe sa supply accountability division sa BFP7 ug Chief Inspector Roy Orbeta, hepe sa BFP sa dakbayan sa Danao.
Si Canillas nahimong hepe sa BFP sa Talisay sa kaping napulo ka tuig sukad niadtong Mayo 8, 2000.
Ubos sa iyang pagdumala sa BFP sa siyudad niadtong tuig 1998, napili siyang Junior Staff of the Year sa BFP7, Junior Fire Officer of the Year niadtong tuig 2005 ug sa maong tuig usab ang BFP Talisay napiling Best City Fire Station of the Year.
Niadtong tuig 2009 si Canillas napiling Best City Fire Marshal of the Year sa Region-7 ug sa maong tuig usab ang Talisay Fire Sub-station sa barangay Poblacion napiling Best City Fire Sub-station of the Year.
Si Bise Mayor Alan Bucao nagkanayon nga si kanhi Konsehal Sabeniano Abatayo maoy consultant karon sa DRRMC ug buot niyang aduna kini katimbang aron matutokan gyud ang pamaagi kabahin sa risk reduction sa Talisay.
Matud sa Bise Mayor nga ikonsiderar ni Mayor Socrates Fernandez nga kuhaon si Canillas nga usa sa mga consultant sa DRRMC kay gikinahanglan kaayo ang iyang abilidad ug kasinatian sa trabaho.
Si Bucao nagkanayon nga buot usab niya nga aduna untay departamento sa DRRMC sa siyudad nga magtutok og mga programa kabahin sa risk reduction ug ang kabahin sa pagtubag sa mga emerhensiya.
Si Canillas sa iyang bahin miingon nga kung kwalipikado siya sa maong posisyon andam siya sa pagdawat niini. - BANAT NEWS