CEBU, Philippines - Patay ang usa ka polis human kini pusila sa usa ka wala mailhing kriminal samtang naglakaw paingon nang mopauli kagahapon sa alas 5:00 sa buntag diha sa barangay Arpili, lungsod sa Balamban.
Ang biktma mao si PO1 Romel Ruben Paping, 32, kinsa nakaangkon og tulo ka mga samad pinusilan sa tuong bukton ug tiyan ug daling gidala ngadto sa Toledo District Hospital apan pila ka oras nakabsan gyud kini sa kinabuhi diha sa nahisgutang tambalanan.
Si Paping ubos sa Batch “Idlas” 2009 ug kasamtangang nadestino sa Regional Public Safety Battalion sa lungsod sa Sibonga.
Si PO3 Julius Obaña sa Balamban Police Station nagkanayon nga sa wala pa mahitabo ang pagpamusil gikan sa balay sa iyang bayaw nga si Gerd Paculba, 25, diha sa nahisgutang barangay si Paping.
Gibana-banang mga 25 ngadto sa 40 metros ang distansiya sa gilay-on ni Paping gikan sa balay ni Paculba dihang nakadungog og tulo ka sunod-sunod nga buto sa armas.
Matud usab ni Obaña nga si Paculba gibati og kabalaka pagkadungog sa sunod-sunod nga mga buto sa pusil tungod kay pipila pa ka minuto nga nakabiya si Paping sa ilang balay.
Pagsusi ni Paculba nakita niya si Paping nga nahay-ad na diha sa yuta ug naligo sa kaugalingong dugo tungod sa mga samad pinusilan.
Ang kapolisan walay na-recover nga mga kabhang sa bala diha sa lugar nga nahitaboan.
Si Obaña mibutyag nga si Paping dunay na-engkwentro sa milabay’ng semana nga gihinganlan og Dwight Carmelitos. Si Carmelitos gipangita pa sa kapolisan aron pangutan-on kabahin sa ilang bingkil ni Paping apan wala na kini igkita sa ilang balay.
Niadtong milabay’ng semana matud pang Obaña nga mipatunga si Paping sa nahitabong kagubot diha sa ilang lugar nga diin si Carmelitos usa sa nalambigit.
Giingong tungod sa pagpatunga ni Paping gibaharan kini ni Carmelitos sa pag-ingon “ayaw pagsalig nga polis ka kay magkita ra ta.”
Si Carmelitos dunay pending nga warrant of arrest sa kasong frustrated homicide ug matud usab ni Obaña nga idlas kini kaayo tungod kay kalit lang kining motungha unya kalit usab nga mawagtang ug wala pa gyud nila kini maatli aron masikop.
Apan gipasabot ni Obaña nga dili sila makatumbok kang Carmelitos nga maoy mipatay kang Paping apan ilaha kining sikupon tungod sa kaso sa maong warrant ug ipaubos usab sa imbestigasyon kabahin sa ulahing insidente. – EIM (BANAT NEWS)