CEBU, Philippines - Wala nay kinabuhing napalgan ang usa ka ‘special child’ nga lalaki nga gituohang nalumos pasado alas-3 sa miaging hapon sa sitio Libas barangay Campusong lungsod sa Borbon.
Ang maong bata nailhan nga si King Philip Del Mar, 13-anyos ug molupyo sa maong lugar.
Sa pakighinabi sa Banat News ni PO2 Winston Magdadaro, imbestigador sa Borbon Police Station mibutyag nga gibilin sa inahan ang anak diha sa ilang panimalay.
Matud pa sa bata nga nakakita sa wala pa mahitabo ang aksidente nga si Arliegh Boy Brigoli nga iyang nakit-an si Del Mar nga naglakaw padulong sa dagat nga nagguroy sa usa ka bangka nga walay katig sa pikas nga bahin niini.
Matud pa ni Magdadaro gibadlong pa kini ni Brigoli apan giingong wala siya panumbalinga niini maong iyaha nalang gipasagdan.
Apan pipila ka oras ang milabay mao nalay napalgan ni Rowen Melgo, usa ka mangingisda sa maong lugar ang naglutaw nga lawas ni Del Mar hinungdan nga dali kini niyang gidala daplin sa baybayon ug gidali pagdala sa Sogod District Hospital apan gideklarar kini nga dead on arrival.
Nagtuo si Magdadaro nga posibleng naglisod na og balik sa daplin ang bata ug nakabuhi kini maong nalumos tungod kay di makamaong molangoy. (BANAT NEWS)