CEBU, Philippines - Gisalikway ni Mayor Michael Rama ang pasumbingay sa iyang mga kritiko nga misaway sa BARUGG ang opisyal nga pamantalaan sa kagamhanan sa Siyudad sa Sugbo.
Ang BARUGG mga unang letra sa Bayanihan Advocates Rallying for Unity and Good Governance.
Matud pa ni Rama nga dako kaayo og ikatabang ang maong newsletter aron masayran sa katawhan nga naglihok ang gobyerno nga iyang gipangunahan.
Sumala pa niya nga matag departamento sa City Hall adunay gihatag nga alokasyon busa dili kini angayang himoong isyu.
Dugang pa sa mayor nga ang ubang mga lugar aduna’y kaugalingong newsletter aron mabasa sa publiko ang serbisyo nga gidalit sa kagamhanan sa ilang mga konstituwente.
Sayo niini mapasigarbuhong gipahibalo ni Carlo Dugaduga ang information officer sa City Hall nga mao kini ang unang higayon nga adunay pamantalaan ang kagamhanang dakbayan sa Sugbo.
Kahinumdoman nga gisaway ni Kongresista Tomas Osmeña ang maong newsletter ug iyang gihulagway nga usa lang ka propaganda sa administrasyon ni Rama ang maong basahon.
Apan si Rama miklaro nga dili kini matawag nga propaganda sanglit igo raman kini naghisgot sa mga proyekto sa siyudad ug tinuod man ang isaysay niini ngadto sa katawhan.(WC) (BANAT NEWS)