CEBU, Philippines - Gipusil ug namatay sa security guard nga nagbantay sa sam-ang ang usa ka batan-on nga lalaki nga tighimo og lapida sa miaging alas-8 pasado sa gabii diha sa Carreta Cemetery sa barangay Carreta siyudad sa Sugbu.
Ang namatay sulod sa operating room sa Vicente Sotto Memorial Medical Center (VSMMC) giila sa kapulisan nga mao si Jeffrey Paz,19, ug molupyo sa nahisgutang lugar.
Samtang ang gitumbok nga nakapusil ug nadakpan sa mga sakop sa Homicide Section sa Cebu City Police Office mao si Graciano Sandoval, 49, nagpuyo sa barangay San Roque ug sakop sa Alesna Security and Detective Agency (ASDA).
Si Sandoval mitug-an nga napugos siya pagpusil sa biktima sa dihang misuway unta kini sa pag-ilog sa iyang service firearm nga 12-gauge shotgun human gihapak ang iyang abaga gumikan sa kahubog sa biktima.
Si Paz gidali pagdala sa iyang kauban nga si Tirso Taneo ug iyang ig-agaw sa VSMMC apan paglabay sa pipila ka gutlo nakabsan kini sa iyang kinabuhi tungod sa samad pinusilan sa iyang kalawasan.
Nakuha hinuon sa kapulisan ang shotgun diha ni Sandoval nga maoy iyang gigamit pagpusil ngadto sa biktima.
Ang mga imbestigador sa Homicide Section pinangulohan ni PO3 Geoffrey Gutual ug mga kaubanan nga nakakuha og impormasyon nga posibleng hubog gyud si Paz sanglit sa wala pa mahitabo ang pagpamusil nakig-inom pa kini sa mga higala.
Matud pa niini nga ang biktima miadto sa guard house diin nagbantay si Sandoval aron unta mogamit sa telepono kay giingong manawag sa iyang hinigugma apan gipugngan ni Sandoval nga dili pasudlon sa guard house.
Apan giingong mipugos kini pagsulod hinungdan nga napusilan sa gwardya. (EIM) - (BANAT NEWS)