CEBU, Philippines - Usa ka 21-anyos nga dalaga nagtiyabaw nga mitungha sa Talisay City Police Station tungod sa kalisang kay diriyot kini malumos ug nakahubo sa underwear uban sa nalunod nilang baroto didto sa sitio Rattan, barangay Tanke dakbayan sa Talisay kagahapon sa buntag.
Si Bernie Abalo, 49, taga barangay Cansojong sa nahisgutang siyudad kinsa kauban sa maong babaye wala mobutyag sa ngalan sa biktima.
Si Gregorio dela Torre, hepe sa Fisherman Sea and Ecological Care (FISECA) nga nahinabi sa mga tigbalita mibutyag nga mga pasado alas 9:00 kagahapon sa buntag nakadawat sila og report gikan ni Kagawad Leo Cabalan sa Tanke kabahin sa usa ka gamay’ng baroto nga naunlod nga may sakay nga babaye ug lalaki.
Apan matud pa ni dela Torre nga dihang gipaadtoan niya sa mga sakop niya aron luwason ang duha, nagdumili kini pagpaluwas tungod kay ang babaye wala nay underwear.
Hinuon gibiyaan sa mga rescuer makadiyot ug pagkataud-taod misul-ob ang maong babaye og purol hinungdan nga mibalik ngadto ang mga rescuer ug mikuyog na kini.
Si Abalo mitug-an sa kapolisan nga bag-o lang silang nagkaila ug ang babaye ug nagkasabot nga mag-inom ug dihang nangalasbag na, nanakay ug baroto ngadto sa lawod. Apan gihapak sila sa dagkong bawod hinungdan nga nahubo ang sapot lakip ang underwear sa babaye uban sa ilang pagkalunod.
Wala kini plano nga mokiha kang Abalo. - BANAT NEWS