CEBU, Philippines - Patay ang usa ka mahuyang nga giingong ‘bugaw’ human gidunggab sa wala mailhing tawo nga iya ra usab nga gikakuyog paglakaw sa miaging alas-10 pasado sa gabii diha kilid sa usa ka department store nga nahimutang sa Mango Avenue sa barangay Camputhaw siyudad sa Sugbu.
Si PO1 Nilo Aventurado sa Homicide Section nga nahinabi sa Banat News miila sa biktima nga mao si Rolan Pasilan, 35, walay trabaho ug giingong usa ka ‘bugaw’ ug nagpuyo sa Unit 1 Opra sa barangay Capitol Site.
Sa pasiunang imbestigasyon nila ni SPO3 Rey Cuyos, PO3 Witzel Berry, PO2 Julius Regis ug PO1 Nilo Aventurado sa Homicide Section nagbutyag nga gitawag ang biktima sa wala mailhing lalaki.
Sa dihang miduol ang biktima nanglakaw sila sa maong dapit apan sa kalit lang gihansakan og gituohang kutsilyo sa maong lalaki ang biktima diha sa dughan ug bukobuko.
Ang kapulisan nakakuha’g impormasyon nga human sa hitabo yano rang milakaw ang suspek paingon sa Fuente Osmeña samtang ang biktima nakahigayon pa og tawag og taksi ug gihatod sa drayber sa Cebu Doctors Hospital.
Matud ni Aventurado nga nakabsan sa kinabuhi ang biktima paglabay sa pipila ka minutos nga pagtabang kaniya sa mga doktor sa nahisgutang tambalanan.
Si Aventurado nagkanayon nga hangtud karun blangko pa gihapon sila pagtumbok sa mamumuno aron masuta ang tinuod nga motibo sa krimen sanglit wala silay nakuhang testigos nga makatumbok sa gikatahapan. - (BANAT NEWS)