CEBU, Philippines - Gipaniguro ni Mayor Paz Radaza nga dili kawad-an sa ilang panginabuhi ang mga drayber sa traysikol kay makapadayon ra man sila sa pagpamasahero taliwala sa pagdagsang sa mga multicab nga pasaheroan.
Matud pa niya nga nagserbisyo usab sa katawhan sa dakbayan ang mga tuloy ligid nga sakyanan tungod kay mao man kini ang dali nga kasakyan sa mga sudlonon ug suok nga mga lugar sa kabarangayan.
Gitataw ni Radaza nga nahimo na nga kabahin sa kalamboan ang mga traysikol sa dakbayan gumikan sa kataas na sa ilang serbisyo sa katawhan.
Gipasabot ni Radaza nga ang gihimo karon sa kagamhanan mao ang higpit nga pagpatuman sa mga lagda alang sa paglikay nga ang mokabat sa 3,000 kapin ka traysikol dili na kadugangan aron nga kapugngan ang paghuot sa sakyanan sa kadalanan.
Aron matuman ang maong pamaagi, gihunong na usab sa ahensya sa panakyanan ang paghatag og prangkisa sa mga traysikol.
Si Rolando Duero mga maoy executive secretary ni Radaza nga nahinabi sa Banat News miingon nga gipamawi usab nila karon ang mga prangkisa nga wala na magamit.
Gitataw niya nga higpit usab nilang gidili ang pagpagamit sa laing tawo sa giluwat nilang prangkisa ngadto sa usa ka operator sa traysikol nga walay pagtugot gikan sa ilang buhatan.
“Adunay mga kaso kaniadto nga ang prangkisa nga giisyu namo, gipagamit ngadto sa laing tawo,” ni Duero pa. “Kini higpit nang gidili sa kagamhanan.
Si Duero miingon nga kun adunay mga prangkisa nga wala na magamit kay gibaligya na ang traysikol, kinahanglang isurender kini ngadto sa nagluwat niini.
Dugang pa ni Duero nga maoy tumong nila nga mahusay na ang dagan sa mga traysikol sa kadalanan sa dakbayan pinaagi sa pagpatuman sa color coding.
“Dali ra natong mailhan kun mosulod ang mga traysikol sa dakbayan sa Lapulapu nga walay prangkisa pinaagi sa color coding scheme.
“Ubos gud sa color coding scheme mailhan, dali rang mailhan ang traysikol nga gikan sa usa ka barangay pinaagi sa kolor nga gipintal sa kilid, ug atubangan sa sakyanan.
Busa matud pa ni Duero sayon ra kaayo ilhon ang mga mamasaherong traysikol nga wala sa iyang rota nga may katumbas usab nga silot. (BANAT NEWS)