CEBU, Philippines - Si Gobernador Gwen Garcia naglaraw nga mopagawas og Administrative Order aron paglimitar sa gidaghanon sa karga sa mga dump truck nga moagi sa kadalanan.
Tumong sa gobernadora nga mapreserbar ang mga kadalanan sa probinsiya sa Sugbo. Gilaraw karon ni Garcia ang pag-isyu og Administrative Order nga magmando sa mga cargo trucks nga limitahan ang mga kargamento.
Tumong sa maong kamanduan mao nga 10 toneladas lamang ang mamahimong makarga sa mga truck de karga para dili maguba ang mga kadalanan nga ginama sa lokal ug national nga kagamhanan.
Si Garcia nakigtigom sa mga opisyal sa Mines and Geosciences Bureau 7 para sa paghimo og mga lakang kalabot sa mga quarry operators kung unsa ang ilang mamahimo niini nga dili makalapas sa nahisgutang kamanduan.
Matud sa Mines and Geosciences Bureau 7 Regional Director, Loreto B. Alburo nga sa ilang mga permit nga naaprobahan ngadto sa mga negosyantye og aggregates wala niini mabutang ang limitasyon sa ilang ipangkarga panahon nga mosubay kini sa mga kadalanan nga ginama sa kagamhanang lokal ug national hinungdan nga ila kining sutaon.
Hinuon mag-abot pa pagbalik si Garcia uban sa Mines and Geosciences Officials, mga negosyante og aggregates, quarry operators, truck association, Land Transportation Office, Land Tranportation Franchising and Regulatory Board ug uban pa nga ahensiya sa gobiyerno aron kasabutan ang nahisgutang problema kini matud ni director Alburo.
Sa nasayran nga adunay mga dalan nga naaspalto sa kagamhanan sa probinsiya ang nangaguba human naagian sa mga truck de karga nga sobra sa karga. (BANAT NEWS)