CEBU, Philippines - Gitugyan sa kagamhanan sa dakbayan sa Lapulapu ang luna nga gidonar niini ngadto sa Palace of Justice sa maong dakbayan.
Kini human pirmahe ang memorandum of agreement (MOA) pinaagi ni Chief Justice Renato Corona atol sa pagbisita niini sa dakbayan niadtong miaging adlaw.
Ang maong luna nga nahimutang sa compound sa balay lungsod sa maong dakbayan kansang gidak-on wala masuta daan nang giandam alang sa dugang pang mga edipisyo nga angayang tukoron niini.
Si Chief Justice Corona sa iyang pamahayag atol sa pagpirma niya sa MOA nagpasalamat sa kagamhanan sa dakbayan sa natampo niini alang sa kalamboan sa serbisyo sa korte sa maong lugar.
Si Mayor Paz Radaza kinsa maoy nagrepresentar sa habig sa kagamhanan sa maong dakbayan ug mipirma usab sa MOA mipadayag usab nga hingpit niyang gisuportahan ang departamento sa hustisya sa pagpatunhay niini sa hustisya diha sa dakbayan.
Matud pa niya nga daan nang gihimo kini sa iyang bana nga si kanhi Mayor Arturo Radaza nga kasamtangan karong nagserbisyo isip kongresista sa lone district sa maong dakbayan. (BANAT NEWS)