CEBU, Philippines - Mitahan sa miaging Martes sa kapolisan sa lungsod sa Tuburan ang usa ka 18 anyos nga lalaki nga suspetsado sa pagdunggab patay sa karibal niining ulitawo sa barangay Opao, dakbayan sa Mandaue sa milabay’ng Valentine’s day.
Ang mitahan mao si Renier Sortones, taga purok Lemonsito sa barangay Umapad, dakbayan sa Mandaue kinsa suspetsadong midunggab patay kang Jamarel Villamor sa purok Camatis, barangay Opao sa maong dakbayan.
Si SPO4 Areston Bataluna Jr. sa kapolisan sa Presinto 5 nga nahinabi sa Banat News miingon nga hinigugma sa namatay ang usa ka dalagita nga kanhi usab hinigugma sa suspetsado
Dugang pa niya nga gikatagbo sa biktima ang suspetsado niadtong gabii sa pagsaulog sa Valentine’s Day sa barangay Umapad ug nahitabo ang panaglalis nga misangko sa pagpanunggab.
Ang biktima nga nasabak sa dughan gideklarar nga dead on arrival sa pag-abot sa tambalanan.
Samtang misibat usab ngadto sa Tuburan ang suspetsado apan nakombinse kini sa mga paryente nga motahan sa kapolisan.
Kagahapon sa buntag gikuha nila ni Inspector Wilson Abot ang suspetsado gikan sa kustodiya sa kapolisan sa Tuburan ug gibalhog karon sa detention cell sa Opao Police Station, sa dakbayan sa Mandaue. (BANAT NEWS)