CEBU, Philippines - Lima ka tawo ang nagtingkagol sa Talisay City detention cell human maaktohing nag-pot session niadtong Lunes sa hapon diha duol sa sementeryo sa barangay Cansojong, dakbayan sa Talisay.
Ang mga suspetsado mao sila si Jackson Labrador, 30-anyos, Cleven Apalisoc, 34, ang duha parehong taga barangay Lawaan I, Talisay, Jeramel Entienza, 37, taga barangay Cansojong sa nahisgutang siyudad, Jessie Cabilles, 36, ug Alfie Cabilles, 34, ang duha parehong taga barangay Tungkop, lungsod sa Minglanilla.
Ang kapolisan nakadawat og tawag sa telepono sa usa ka concerned citizen kinsa mi-report kabahin sa nag-pot session diha sa may sementeryo sa ilang lugar.
Ang lima naaktohan sa mga polis nga mitubag sa alarma diha sulod sa usa ka payag nga naghingos og ginadiling drugas.
Na-recover sa mga polis gikan sa mga suspetsado ang mga drug paraphernalia nga gamiton sa paghingos og shabu lakip na niini ang duha ka gagmay’ng plastik nga pakete ug duha ka tin foil nga giingong dunay traces sa shabu.
Ang lima nag-atubang sa kasong paggamit ug paghupot og ginadiling drugas. (BANAT NEWS)