CEBU, Philippines - Ang Ramon Aboitiz Foundation Inc. (RAFI) inubanan sa Integrated Midwives Association of the Philippines Inc. ug Vicente Sotto Memorial Medical Center (VSMMC) Breast Clinic mopahigayon og cervical ug breast screening activity karong umaabot Pebrero 19.
Ang maong aktibidad gitakdang sugdan sa alas 8:00 sa buntag ug humanon usab kini untop alas dose sa udto ug sa dili pa sugdan ang screening sa mga pasyente may lecture pa nga pagabuhaton.
Nasayran nga ang maong kalihokan usa lang sa mga adbokasiya sa RAFI kini sa tinguha nga hisayran sa mga babaye kun aduna o wala ba silay breast ug cervical cancer.
Ang RAFI miawhag sa katawhan nga mintenahon ang hustong pag-atiman sa lawas pinaagi sa pagkaon og mga maayong matang sa pagkaon nga puno sa nutrition, kanunay nga mag-ehersisyo, ug paglikay sa hilabihang kahago.
Nasayran nga ang hinungdan sa breast cancer mao ang pagpanubo sa mga unod sa ilawom sa dughan nga kasagarang moigo sa mga kababayen-an nga nagpangidaron og 30 hangtod 59-anyos.
Samtang ang cervical cancer mao usab ang ikaduha anaa sa listahan nga kasagarang maangkon sa mga kababayen-an.
Niadtong tuig 2007 mikabat sa 829 ka kaso sa cervical cancer natala sa RAFI. - BANAT NEWS