CEBU, Philippines - Dili na maproblema ang mga mayor nga miyembro sa Metro Cebu Development Council (MCDC) kun sila may proyektong tukoron aron sulbaron ang nag-unang problema sa Metro Cebu human sa gipahigayon nga meeting sa miaging adlaw.
Kini tungod kay may gigahin karon nga P1 bilyon nga pasiunang pundo ang kagamhanan nga magamit sa mga Local Government Unit (LGU) sa Metro Cebu.
Sumala pa ni Gobernador Gwendolyn Garcia nga ang tunga sa bilyon ka pesos ning pundoha, gikan sa kagamhanan sa lalawigan sa Sugbo samtang ang laing tunga, gitanyag usab sa Development Bank of the Philippines (DBP).
Sigon pa sa gobernador nga ang maong pundo ipahuwam ngadto sa mga siyudad ug kalungsoran sa Metro Cebu sa kubos ra kaayong interest aron dili kaayo mabug-atan ang mga mayor sa pagbayad.
Ang pagkahimugso ning maong pundo nakab-ot atol sa panagtagbo ni Gobernador Garcia ug ang Vice President sa DBP nga si Rosalier Dagondon
Nasabotan nila nga ang maong salapi magamit sa LGU alang sa pagpaayo sa ilang mga imbornal ug uban pang proyekto sa kalungsoran ug dakbayan sa Metro Cebu.
Gawas niini ang DBP mohatag pa og dugang insentibo alang sa mga LGU nga mohuwam ning maong pundo ug ang tanan gitumong aron masulbad ang suliran sa baha, trapiko ug uban pang mga suliran nga nasinati sa mga lugar sa amihanan gikan sa dakbayan sa Sugbo ngadto sa Danao ug sa habagatan gikan sa dakbayan sa Sugbo ngadto sa Carcar. (BANAT NEWS)