CEBU, Philippines - Gimandoan sa Department of Interior and Local Government (DILG-7) ang tanang mga mayor dinhi sa Central Visayas ilabina dinhi sa Sugbo nga moabag sa Department of Education (Dep-Ed) pagpatuman og higpit nga siguridad sa palibot sa mga publikong tunghaan sa ilang tagsa- tagsa ka hurisdiksiyon.
Kini aron dili na masubli ang nahitabong pagdagit ug pagpatay sa tinun-an sa grade-one didto sa Calajo-an Elementary School human sa klase niadtong Martes ug gilabay nga patay na pagka Miyerkules sa buntag didto sa barangay Guimbuwangan, lungsod sa Barili.
Matud ni DILG-7 Regional Director Pedro Noval nga moluwat siya og memorandum ngadto sa mga mayor aron awhagon kini pagtigom sa local peace and order council niini aron molihok sa paghatag og siguridad sa mga tunghaan sa ilang lugar.
Gipasabot ni Noval nga nagkinahanglan karon og tabang ang Ded-Ed ilabina ang bahin sa siguridad sa mga publikong tunghaan sa nagkalain laing dapit dinhi sa rehiyon. Gusto ni Noval nga mopirma og commitment ang mga mayor sa kalungsoran aron motabang pagsulbad sa maong problema alang sa siguridad sa mga tinun-an.
Kini sama sa pagdestino og polis uban sa barangay tanod sa matag barangay nga may eskuylahan.
Hinuon sa dakbayan sa Mandaue nagkahiusa na ang mga opisyal sa Department of Education (Ded-Ed) ug kapolisan nga bantayan og polis ang matag tulunghaan sa maong dakbayan.
Si DepEd administrator Benjamin Tiongson midayeg sa mando nga giluwatan ni Sr.Supt. Noel Gillamac, hepe sa kapolisan sa maong dakbayan nga nagdestino og polis sa matag eskuylahan sa kagamhanan.
Ang tumong niini nga aron di masubli ang nahitabo sa usa ka 6 anyos nga tinun-an sa Calajo-an Elementary School sa lungsod sa Minglanilla kinsa gipatay sa midagit niini niadtong Martes sa hapon. (Uban sa report nila ni Bong Soriano ug Romeo T. Limpangog) (BANAT NEWS)