CEBU, Philippines - Nakuratan ang kadagkuan sa Armed Forces of the Philippines (AFP) Central Command sa nahitabo kang kanhi AFP Chief of Staff nga kanhi Department of National Defense Secretary Angelo Reyes nga giingong naghikog pinaagi sa pagpusil sa iyang kaugalingon kagahapon sa buntag didto sa Quirino Memorial Cemetery.
Si Lt. General Ralph Villanueva pangu sa Central Command sa press conference kagahapon mibutyag nga dili siya makatuo sa nahitabo kang Reyes sanglit sa nangaging mga adlaw padayon ilang monitoring sa imbestigasyon sa kontrobersyang gipasangil nga gikalambigitan sa naulahi.
Si Reyes sumala pa nagpusil sa iyang dughan gamit ang kalibre 45 pistola atubangan sa lubong sa inahan niini kagahapon sumala pa sa usa ka testigo apan ang kapolisan wala pa mohatag og opisyal nga pamahayag kabahin sa nahitabo tungod kay wala pa mahuman ang imbestigasyon.
Gihulagway ni Villanueva si Reyes nga usa ka maayong opisyal bisan tuod kun wala siya magserbisyo sa buhatan niini kaniadto sa wala pa mahimong gitudlong pangulo sa AFP ug DND daghan kining nahatag nga kaayohan dili lang sa Central Command kundili lakip na ang ubang kampo sa militar lukop nasud.
Giangkon ni Villanueva nga naapektahan gyud ang mga sundawo ngadto sa kinaubsang ranggo sa maong kontrobersya apan iyang gipatawag ang mga opisyal sa tanang units aron maoy mopasabot ngadto sa ilang mga sakop nga dili magpaapekto sa ilang trabaho.
“We always talked to my officers to remind them to intensify security in Visayas Region, and not to be affected, kahit nanonood yung sundalo sa investigation,” matud pang Villanueva.
Siya nanghinaot sa imbestigasyon nga palapdan ug humanon sa daling panahon kay ang tanang sundalo nagsunod sa maong isyu sa giingong kurapsyon sa AFP ug kung duna may sad-an niini kinahanglang manubag gyud aron dili madamay ang organisasyon. (BANATNEWS)