CEBU, Philippines - Gitakdang makadawat sa dili madugay ang siyudad sa Sugbo og mga kasangkapan alang sa tambalanan gikan sa usa ka kompanya nga nagbase sa Japan.
Sumala pa ni Mayor Michael Rama nga ang maong mga butang pulos mga second hand apan lig-on gihapon ang kalidad niini. Kini naglangkob sa mga wheel chair, bed, oven, food warming ug uban pa.
Idonar kini nganhi sa dakbayan sa Sugbo pinaagi sa Shinseijuzenkai Medical Corporation nga gidumala ni Hiroshi Akaki sa Japan.
Kini human magkatagbo si Mayor Rama ug si Akaki didto sa Kyoto, Japan sa pagduaw sa mayor sa dakbayan sa Sugbo ngadto sa maong nasud sa milabay’ng semana.
Matud pa ni Rama nga nasud-ong gayud niya ang maong mga butang dihang gipatan-aw siya niini ni Akaki.
“Dili bakasyon ang akong giadto sa Japan , parte kadto sa akong trabaho nga makakuha kita og donasyon aron matabangan ang atong pampublikong tambalanan ug barangay health centers,” nagkanayon si Rama.
Nagkanayon ang mayor nga sa miaging tuig ang mga opisyales sa nahisgutang kompanya mibisita dinhi sa dakbayan ug nasaksihan nila mismo ang kakuwang sa mga kahimanan sa tambalanan sa gobyerno sama sa Cebu City Medical Center nga kuwang kaayo og mga katre.
Dugang pa sa mayor nga dili lang kay ang tambalanan sa CCMC maoy walay katre, kundi bisan ang mga health center wala usab niining maong mga kasangkapan. (BANAT NEWS)