CEBU, Philippines - Ang konseho sa dakbayan sa Talisay migama og kaugalingong Citizen’s Charter nga magsagop sa Akta Republika 9485 kun “Anti-Red Tape Act of 2007” tumong niini ang pagpauswag sa maayong serbisyo sa gobiyerno sa siyudad ngadto sa katawhan.
Niadtong Martes atol sa regular session sa konseho sa Talisay giaprobahan ang ordinansahon kabahin sa nahisgutang balaod.
Ang maong ordinansahon nga gipangamahanan ni Konsehal Romeo Villarante sa oposisyon unang naduso niadtong buwan sa Septiyembre sa milabay’ng tuig ug napasar sa unang pagbasa.
Ang chairman sa committee on laws nga si Konsehal Richard “Choy” Aznar mirekomendar sa approval sa maong ordinansahon niadtong milabay’ng Martes.
Si Villarante nagkanayon nga ang nahisgutang bag-ong balaod gitumong aron mouswag ang maayong pamunoan nga may transparency o walay lipodlipod nga pangalagad, responsabli ug dinaliang pagpanghatod sa serbisyo ngadto sa publiko sumala sa gilatid sa Akta Republika 9485.
Matud niya nga ubos sa bag-ong ordinansa nagbuot kini nga tanang mga yangungo sa publiko sa city hall kinahanglang hatagan og dinaliang pagtagad sa kawani o opisyal nga nadestino sa buhatan diin gipahigayon ang transaksiyon.
Ang yano nga transaksiyon kinahanglang matubag na sa dili molapas sa lima ka adlaw’ng tingtrabaho, ug kun lisud-lisod nga hangyo mahimong lugwayan kutob sa 10 ka adlaw apan dili usab molapas sulod ning maong period.
Sumala sa gisugyot sa maong balaod nga kinahanglang walay mga application nga mahibalik ngadto sa mga kliyente nga wala maatiman o mahatagi og aksiyon.
Kun ang transaksiyon o application dili maaprobahan, nalatid usab sa nahisgutang ordinansa nga ang opisyal o kawani nga nadestino sa pag-atiman niini mopadala og formal notice ngadto sa kliyente sulod sa lima ka adlaw nga tingtrabaho gikan sa pagdawat sa application.
Ubos usab sa Citizen’s Charter nagmando usab kini sa pagtukod og steering committee nga maoy magsilbing advisory body sa kagamhanan sa dakbayan. (BANAT NEWS)