CEBU, Philippines - Giplano sa kagamhanan sa dakbayan sa Mandaue ang pagbalhin sa klase sa mga tinun-an sa Guizo Elementary School ngadto sa Mandaue City Central School sa barangay Centro sa maong dakbayan alang sa pagpadayon sa klase sa mga kabataan.
Kini human masugamak sa baha ang maong tulunghaan hinungdan nga nasuspenso ang klase sa mga kabataan niini.
Sa tigom sa mga sakop sa school board nga gipangulohan ni Mayor Jonas Cortes isip chairman, ilang gituki ang maong isyu diin didto gimando sa mayor nga tukoron ang usa ka edipisyo sa eskuylahan nga may 20 ka lawak sa Centro Elementary School aron adto klasehe ang taga Guizo.
Sayo niini giinspection sa mayor ang Basak Elementary School ug Tipolo High School diin ilang nasuta nga dili gayud makalikay nga mabahaan ang maong mga eskuylahan sa panahong mohugpa ang kusog nga uwan gumikan kay nahimutang kini sa lugar nga bahaanan.
Gipaabot nga magamit na ang bag-ong eskuylahan sa Centro inigbukas sa klase sa Hunyo. (BANAT NEWS)