CEBU, Philippines - Gitabangan og luba hangtud nga namatay ang usa ka mag-uuma nga giatangan sa duha niya ka silingan samtang naglakaw paingon na mopauli sa ilang pinuy-anan pasado alas-10 sa miaging gabii diha sa bukirang bahin sa barangay Lipanto sa lungsod sa Alegria.
Si Julian Egona Evas, 56, molupyo sa nahisgutang lugar nakaangkon og walo ka samad dinunggaban, lima sa buko-buko, usa sa dughan ug duha sa ulo.
Boluntaryo hinuong mitahan ang duha ka gitumbok nga suspetsado sa maong kremin nga sila si Anastacio Estrada Jr, 27, ug Ricardo Baylosis, 23, pulos mag-uuma ug silingan sa biktima.
Si Vedasto Catubig, kanhi kagawad sa maong lugar maoy mi-turnover sa duha ngadto sa kapulisan lakip na ang kutsilyong gigamit sa pagluba nga may gitas-ong walo ka pulgadas.
Si SPO1 Barktomiano Gargar nga nahinabi sa Banat News mitug-an nga sa sayo pa, nag-inom ang biktima ug ang mga suspek hangtud nga mitumaw ang panaglalis.
Matud ni Gargar nga pasado alas -10 na sa gabii milakaw ang biktima paingon mopauli apan giatangan na kini nila ni Estrada ug Baylosis ug gitabangan og luba.
Wala pa hinuon ma-establisar sa kapulisan ang ugat sa gilalisan sa biktima ug sa suspek nga misangko sa pagpatay.
Si Dr. Samson Dela Peña ang municipal health officer sa maong lungsod moy mideklarar nga patay na ang biktima tungod sa lawom nga samad nga naangkon diha sa bukobuko ug dughan.
Si Sr. Insp. Daniel Comission, hepe sa Alegria Police station nga nahinabi sa Banat News miingon nga ang biktima ug mga suspek namista sa ilang silingan nga dunay debosyon.
“Lantugi nga walay klaro, ang sinugdanan sa ilang lalis, unya pulos na nakainom,” ingon pang Comission. (BANAT NEWS)