MANILA, Philippines -Duha ang patay sulod lang sa 50-minutos gikan sa managlahi nga lugar sa lalawigan sa Sugbo ug usa sa mga namatay usa ka kagawad sa barangay.
Alas 3: 10 sa kaadlawon kagahapon patay si Ricardo Parame, 29, usa ka konsehal sa barangay Bagakay sa maong syudad human kini gipusil sa wala mailhing sa Village 2 barangay Lutopan syudad sa Toledo.
Base sa imbestigasyon sa kapolisan sa syudad sa Toledo samtang nagbarog ang biktima sa gawas nga bahin sa ilang panimalay kalit lang siya nga nakabantay nga daw adunay tawo sa ilang palibot.
Apan una pa niya makit-i ang maong tawo kalit kining gipusil makatulo ka higayon ginamit ang kalibre .45 diin maayong pagkaigo sa tuong kilid nga bahin sa lawas sa biktima ug sa tuong batiis.
Human sa pagpamusil ang mamumuno dali usab nga miikyas sa maong lugar samtang ang biktima daling gidala sa Carmen Copper Corporation Hospital apan dangtan ug pipila ka minutos nakutlo-an ra usab kini sa kinabuhi.
Sa pakisusi sa kapolisan sa crime scene usa ka deformed slug ug duha ka kabhang sa kalibre .45 ang ilang nakaplagan.
Nagduda ang mga polis nga kawatan og manok ang mipusil sa biktima apan gisusi usab nila ang ubang anggulo sa kamatayon sa kagawad.
Samtang untop alas-4 sa kaadlawon, bala usab maoy mipukaw sa usa ka lalaki human kini gipusil sa sitio Tangke barangay Kawit lungsod sa Medellin.
Ang namatay nailhan nga si Marcelito “Bondying “ Yurag, 21, molupyo sa sitio Baring sa maong lungsod samtang ang suspetsado nailhan usab nga si Vicente Barro Mondejar, molupyo sa maong lugar.
Base sa imbestigasyon sa kapolisan sa lungsod sa Medellin nasayran nga ang biktima nahinanok og katulog sa usa ka lingkuranan nga lantay dihang kalit gibunlot sa usa ka Randy Villarin ang gihigdaan niini ug gibunal sa dalan.
Kini maoy hinungdan sa kagubot sa duha sa maong dapit apan tungod sa kabanha sa duha kalit migawas ang suspek sa ilang balay ug gipusil ang biktima duha ka higayon.
Matud pa ni Dr. Roberto Palilio, ang medico legal nga ang hinungdan sa kamatayon sa biktima mao ang samad pinusilan niini sa walang bahin sa iyang dughan nga milapos sa likod.
Samtang ang usa ka bala maayo usab nga pagka-ungot ngadto sa gusok nga bahin ubos sa dughan human ang biktima maigo usab sa likod nga bahin. Human sa maong panghitabo ang suspetsado dali usab nga misibat.
Samtang nasayran usab sa kapolisan nga ang biktima ug ang suspetsado dugay nang adunay personal nga panagbangi. (BANAT NEWS)