CEBU, Philippines - Paesplikaron sa Hunta Probinsiyal sa Sugbo ang kadagkoan sa Department of Public Works and Highways labot sa kalangan sa pagpalapad sa karsada sa Cebu North Coastal Road. Si Bokal Thadeo Ouano ang nangusog nga madapit sa ilang sesyon karong hapon ang kadagkoan sa DPWH 6th District Engineering Office aron kahatagan sila og katin-awan sa estado sa Tayud-Consolacion-Liloan Road Expansion Project nga nagdugtong sa taytayan sa Cansaga, Consolacion.
Ang nasudnong kagamhanan migahin na og P50 milyones alang sa proyekto ug ipaagi kini sa Kapitolyo kinsa maoy mopatuman niini.
Si Gob. Gwendolyn Garcia ug ang DPWH ang nagpirmahay na og kasabutan labot sa pagpatuman sa proyekto human gisubhan ni kanhi presidente Gloria Macapagal Arroyo ang Cansaga Bridge.
Sa tigum sa Infrastructure Development Committee sa Regional Development Council - 7 niadtong Nobiyembre 2010, giklaro ni DPWH 7 regional legal officer Agustino Hermoso nga ang P50 milyones gastuhon kini sa pagbayad sa road-right-of-way ug uban pang civil works. (BANAT NEWS)