CEBU, Philippines - Nakamugna og pagtuo sa Talisaynon nga ang pagbutang sa hulagway sa anak ni Kongresista Eduardo Gullas sa dakong tarpaulin sa ibabaw sa dakong hawan nga parkinganan sa mga traysikol sa barangay Tabunok, mokandidato ang batan-ong Gullas sa umaabot nga piniliay.
Kay ang maong tarpaulin dugay nang gibitay sa maong lugar nga nagpasundayag sa dagway sa kongresista sa unang distrito sa lalawigan sa Sugbo.
Apan niining bag-o wala man hinuon makurat ang katawhan apan sa nakita nila nga ang hulagway na ni Gerard Anthony “Didi” Gullas sa maong tarpaulin, misantop dayon sa hunahuna sa katawhan ang dakong kalagmitan nga mo-entra na sa politika ang batan-ong Gullas.
Ang maong hulagway sa anak ni Kongresista Eddiegul banta-aw kaayo sa mga motorista ug mga pasahero sa mga sakyanan nga moagi sa flyover sa Tabunok paingon ngadto sa habagatang bahin sa lalawigan.
Si Talisay City Councilor Romeo Villarante nga sakop sa kampo sa oposisyon nagkanayon nga ang maong pagbitay sa dakung hulagway sa batan-ong Gullas nagpasabot lang nga mosalmot kini sa bugnong lugaynon sa piniliay sa 2013.
Si Kongresista Gullas anaa na sa iyang katapusang termino ug gituohan nga si Didi maoy mopuli kaniya ngadto sa Kongreso.
Kahinumdoman nga niadtong 2001 dihang sa Kongresista Gullas mikandidato isip mayor sa dakbayan sa Talisay ang manghod niining si kanhi Kongresista Jose “Dodong” Gullas maoy mi-kongresista sa unang distrito. - BANAT NEWS