CEBU, Philippines - Luwas ang tulo ka American national nga sakay sa usa ka yati nga gikatahong na-missing sulod sa pipila ka adlaw, midunggo na kagahapoan sa alas-2 sa kaadlawon sa kadagatan sa barangay Poblacion sa lungsod sa Carmen, Cebu.
Usa ka S/V Pineapple yacht nga gisakyan sa tulo ka mga langyaw nga sila si Captain Chris Bell, ug maoy kapitan, navigator nga si Steven Blantonn, crew nga si Corey Goldhorn, luwas nga midunggo kagahapon sa kaadlawon. Si Captain Anelito Cabisan, tigpamaba sa Philippine Coast Guard sa Eastern ug Central Visayas uban sa iyang duha ka mga sakop mipahigayon dayon og ocular inspection sa maong yati.
Kini gipanag-iya sa usa ka James Underwood, 62, usa ka American national nga naminyo na sa usa ka Filipina nga si Charito Mangubat Areola, 40, nga taga Dawis Sur Carmen kinsa kanhi U.S serviceman nga taga Kansas U.S.A ug kasamtangan nang nagpuyo sa nahisgutang lugar.
Subay sa gihimong pakisusi ni Gabisan nasuta nga ang maong yati gipalit ni Underwood didto sa Guam niadtong bulan sa Disyembre ug si Bell maoy mipasalig nga maoy modala niini paingon dinhi sa Pilipinas.
Ang maong yati, matud pa sa report nga kun maabot unta dinhi sa Pilipinas gikatakdang i-dry dock diha sa barangay Dunggan, siyudad sa Danao niadtong Enero 6 apan ang ilang arrival gikatahong na-delay.
Tungod niini ang US Coast Guard ug Philippine Coast Guard milusad dayon og search and rescue operation sa kadagatan partikular sa Eastern Visayas ug sa may Surigao Strait hangtud nga kini nasigpatan sa Islander Plane sa Philippine Navy ug gi-report dayon ngadto sa PCG.
Ang BRP San Juan, nga usa ka Search and Rescue nga barko sa PCG maoy miadto sa dapit diin masigpati ang maong yatI ug gikan didto giguroy kini padulong sa Leyte ug kagahapon miabot dinhi sa Sugbu.
Sumala pa ni Bell sa mga tigbalita nga misugat kanila NGA naguba ang ilang radar maong naglisod sila pag-nabigar sa ilang yatI ug nadungagan pa ang aberya sa ilang mga ekipo nga nakalangay apan giklaro niyang wala gyud sila mabutang sa peligro tungod lang niini. - BANAT NEWS