CEBU, Philippines - Karong Enero 26 na lang kutob ang pagpanawat og nominasyon alang sa Search for Outstanding Individuals and Institutions (SOII) 2011.
Ang nominasyon adto iduso sa buhatan sa Cultural and Historical Affairs Commission (CHAC).
Gani kaniadtong Disyembre 15, 2010 pa ang deadline niini apan giuswag lang kini karong Enero 26 sanglit tulo pa lang ang nadawat nila nga nominasyon.
Ang Search for Outstanding Individuals and Institutions (SOII) maoy kabahin sa pagsaulog sa ika- 74th Cebu City Charter day sa sunod buwan. Ang porma sa nominasyon gisugdan na sa pag-apod-apod niadtong Oktobre sa miaging tuig ngadto sa nagkadaiyang departamento sa Cebu City Hall, opisyales sa siyudad , mga barangay official, non-government organization ug ubang civic organization.
Alang sa gusto nga mahimong nominado sa “ outstanding institution” kinahanglang makapamatuod kini nga may natampo siya sa paglambo sa dakbayan pinaagi sa nagkadaiya nga programa alang sa katawhan
Mahinungdanon usab nga nakigtambayayong kini sa kagamhanan sa siyudad sa pagdalit og mga importanteng serbisyo ngadto sa mga tawo.
Sa buot usab nga mahimong nominado isip “outstanding individual”, kinahanglang nagpuyo na kini dinhi sa siyudad sa dili mominos tulo ka tuig ug nakahatag usab og igong dungog sa iyang kaugalingon nga maipasigarbo ngadto sa ubang tawo. Kinahanglan usab nga namintenar niini ang maayong karakter sa iyang posisyon.
Ang mga nominado mag-agi og higpit nga deleberasyon sa mga sakop sa CHAC aron makiangayon unya ang matuboy nga mananaug. (BANAT NEWS)