CEBU, Philippines - Nabuslot ang tiyan sa usa ka bayong-bayong dihang gipusil kini sa iyang kontra samtang didto sa diskohan sa dalan Mabini, barangay Poblacion, dakbayan sa Danao sa miaging gabii.
Ang biktima mao si Eugene Palma, 15, samtang ang suspetsado mao si Ian Laguna nga pulos molupyo sa sitio Pulang Yuta sa barangay Looc sa maong dakbayan.
Si PO2 Marlon Remullo sa Danao Police Station nga nahinabi sa Banat News miingon nga nagbarog-barog ang biktima nga nagtan-aw sa nanayaw sa disco nga gipahigayon sa maong lugar dihang kalit lang mitumaw ang suspetsado ug gipusil siya sa walay igong hinungdan.
Dihang nahagba na sa yuta ang biktima misirit usab ang suspetsado pahilayo gikan sa maong lugar.
Didto dad-a ang biktima sa Danao District Hospital apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo. Si PO2 Remullo miingon nga nagkaaway na ang biktima ug ang suspetsado sa miaging mga adlaw ug ilang gituohan nga panagdumot maoy hinungdan sa maong pagpamusil.
Dugang pa ni PO2 Remullo nga pasakaan nila og kasong frustrated murder ang suspetsado sa higayong ila kining madakpan. (BANAT NEWS)