CEBU, Philippines - Matapos na karung tungang gabii ang gipatumang kinse ka adlaw nga special gun ban sa kadagkuan sa kapulisan sa Central Visayas alang sa milabay’ng Sinulog niadtong Domingo.
Kahinumduman gipatuman kini sugod niadtong Enero 6 human gipirmahan ni PNP Chief Raul Bacalso ang pagsuspenso sa Permit to Carry Firearms Outside Residence (PTCFOR) sa siyudad sa Sugbu, Mandaue, Talisay ug Lapulapu ingon man sa tibuok lalawigan sa Sugbu.
Si Sr. Supt. Melvin Ramon Buenafe, hepe sa Cebu City Police Office (CCPO) nagkanayon magpadayon gihapon ang checkpoints.
Atol sa special gun ban ang CCPO nakakumpiskar og duha ka illegal nga armas ug duha sab ka tag-as nga armas nga mao ang M14 rifle ug M16 Armalite rifle nga gipanag-iya sa usa ka pulis nga nadestino sa probinsya sa Masbate.
Si Buenafe miingon nga ang duha ka tag-as ilaha nga gikumpiskar human gi-turnover sa security sa usa ka hotel niadtong Domingo, apan sa ilang pakisusi nasuta nga gipanag-iya kini’g pulis nga nag-escort og contingent gikan sa Masbate.
Ang armas, matud ni Buenafe ilaha nang giuli sa pulis human sa Sinulog human masuta nga sakop gyud kini sa PNP ug legal ang pagdala niini sa maong armas. (BANATNEWS)