CEBU, Philippines - Nalandig sa tambalanan ang usa ka asawa human kini unaya sa pagtigbas sa iyang bana nga nerbyuso didto sa sitio Kanlaguno, barangay Poblacion, lungsod sa Aloguinsan, kagahapon sa kaadlawon.
Apan gisuwayan usab og gulgol sa suspetsado ang kaugalingon niyang liog human sa iyang pagtigbas sa iyang asawa, apan kay gisakitan, wala nalang niya dayona og putol ang iyang liog.
Nakaangkon og mga samad tinigbasan sa iyang ulo ug taas nga bahin sa wala niyang aping si Martina Cañete, 53, nga taga barangay Poblacion sa nahisgutang lungsod.
Samtang ang iyang bana nga mihabas kaniya mao si Quirino Cañete, 53, kinsa giingong nag-antos sa sakit nga nerbyus.
Ang mga silingan sa suspetsado nagkanayon nga gidebuenas kini kay gumikan kay gibang ang iyang sundang wala kini makadulot og lawom ug dihang gisakitan siya, miiktin siya sa kasakit ug wala na dayona og putol.
Ang magtiayon gihatod dayon ngadto sa Pinamungahan District Hospital apan si Quirino gipagawas dayon sa doktor kay gamay ra kaayo og samad ang liog ug gipapahuway siya karon sa sulod sa prisohan sa kapolisan sa Aloguinsan, samtang si Martina gibalhin ngadto sa Vicente Sotto Memorial Medical Center.
Si PO1 Fredeniel Cabañero sa Aloguinsan Police Station sa pakighinabi niini sa Banat News kagahapon mibutyag nga base sa imbestigasyon sa grupo ni PO2 Alexis Racaza, nasayran nga sa wala pa mahitabo ang pagpanigbas, ang magtiayon nangatulog apan gituohan nga misuol ang kabuhi ni Quirino busa mikuha kini og sundang kay tigbason ang iyang asawa, apan nasanta kay nasuko ang asawa busa nagkalalis sila.
Dihang miinit ang panaglalis, wala na kapugong ang suspetsado sa iyang kamot nga nagkurog, gidayon ang pagtigbas sa iyang asawa hinungdan nga natabas ang ulo ug aping niini.
Ang anak nilang dalaga nga si Maricris, nakamata gumikan sa kaguliyang sa iyang amahan ug inahan ug misuway kini pag-ilog sa sundang apan gilupig siya sa kusog sa iyang amahan busa wa gyud niya mabawi ang sundang niini.
Si Maricris nangayo og panabang sa ilang mga silingan hinungdan nga nakagawas sa balay ang iyang inahan ug nakadagan nga samdan. - BANAT NEWS