CEBU, Philippines - Patay na nga napalgan sa mga polis ang usa ka 74-anyos nga lola diha sulod sa iyang balay niadtong Sabado sa gabii sa barangay Valencia Lungsod sa Alegria kini gituohang gipuspusan sa ulo.
Ang biktima giila sa mga polis nga si Teodula Letigio, residente sa nahigutang dapit kinsa nag-inusara lang nga nagpuyo diha sa iyang balay.
Si Jonas Lendio tanod sa nahisgutang barangay maoy mitawag sa police station ug mi-report sa maong hitabo.
Sila si SPO1 Francisco Paulin, PO3 Renato Abellar, PO1 Alexander Lerio ug PO1 Lenard Francis Cabahug daling miresponde sa hitabo.
Si Abellar nga nahinabi sa Banat News kagahapon nagkanayon nga naabtan nila ang biktima nga nagbuy-od ug ang nawong niini nag-umod ngadto sa sawog, dunay migawas nga dugo sa ilong, migawas ang dila ug dunay dugo nga migawas sa baba ug ang ulo niini adunay samad timailhan nga gibunalan kini og gahing butang.
Matud ni Abellar nga ilahang gituohan nga kaila lang sa biktima ang kriminal ug nagkaestorya pa kini dayon gituok una pa hapaka og gahing butang sa ulo.
Dugang usab ni Abellar nga tulo ka anggulo ang ilang gisubay karon sa ilang imbestigasyon una mao ang tulis tungod kay base sa ilang nahipos nga report bag-o lang nahalinan og kopras ang biktima.
Ikaduha mao ang panimalos tungod kay ang biktima suspetsado sa kamatayon sa iyang maguwang nga babaye sa milabay’ng tuig diha sulod sa balay ni Letigio. Ug ang ikatulo mao ang bangi kabahin sa kabiling luna sa ilang pamilya. - BANAT NEWS