CEBU, Philippines - Usa ka ulitawo kinsa motambong unta sa fluvial mass naangol human kini pusila sa tulo ka mga mitulis kaniya didto sa sitio Kinalumsan, sa barangay Gun-ob, dakbayan sa Lapulapu sa miaging kaadlawon.
Ang biktima mao sila si Florentno Pino Ubaldo Jr., 20, ulitawo nga nagpuyo sa maong dapit.
Si SPO2 Frederict Islet sa Theft and Robbery Section sa kapolisan sa maong dakbayan nga nahinabi sa Banat News miingon nga nag-atang og sakyanan ang biktima kay motambong sa fluvial mass sayo sa kaadlawon sa dakbayan sa Mandaue dihang kalit lang gihunongan sa usa ka motorsiklo nga giluwanan sa tulo ka wala hiilhing tawo.
Nakalitan ug wala makalihok ang biktima dihang usa sa mga angkas niini kalit nga milanit sa iyang armas de fuego dayong pahibawo nga tulis.
Unya giilog niini ang sling bag sa biktima nga gisudlan sa iyang digital camera nga nagkantidad og P10,000, cellphone nga mibalor og P5,000, salapi nga P300 ug ID sa iyang gitrabahoang kompaniya ug ATM niini.
Dugang pa ni SPO2 Islet nga human makuha ang sling bag sa biktima, wala pa matagbaw, ang usa sa mga angkas nga tulisan mipusil pa sa ulo sa biktima ug suwerte kay nakalihay siya og dyutay busa igo lang mitapsing ang bala sa iyang bagol-bagol.
Dali nga gidala ang biktima ngadto sa Lapulapu City District Hospital samtang gipangita pa sa kapolisan ang mitulis niini. (BANAT NEWS)