CEBU, Philippines - Mokabat sa P700,000 nga kantidad nga halin sa usa ka dakong tindahan sa dakbayan sa Mandaue ang nahanaw ug gituohang gisakiyo sa mga kawatan kinsa nakasulod pinaagi sa paglungkab sa pultahan sa maong tindahan alas- 4 pasado ang takna sa miaging kaadlawon.
Ang gilungkab nga tindahan mao ang Alvis General Merchandise nga gipanag-iya ni Neria Mina Alparo, 69.
Si SPO1 Dexter Martin sa Investigation Section Detection and Management Bureau (IDMB) miingon nga nakahigayon sa pagsulod ang mga kawatan sa maong tindahan pinaagi sa paglungkab sa mga steel bar sa pultahan.
Ang mga kawatan gituohang migamit og bara sa paglungkab sa pultahan ug milungkab dayon sa kaha nga maoy gisudlan sa maong kwarta.
Si Fidela Pelayo, 48, kawani sa maong tindahan miingon nga halin sa miaging adlaw ang maong kantidad.
Base sa imbestigasyon nga gihimo nila ni Martin ilang nasuta nga walay gwardiya ang maong tindahan. (BANAT NEWS)