CEBU, Philippines - Usa ka sakop sa Barangay Intelligence Network (BIN) nga nagdala og armas nga walay lisensya giunay ra usab og dakop sa kauban niyang BIN didto sa South Road Properties (SRP) habig sa barangay Mambaling sa miaging gabii.
Si Rolan Angelo Yap, hingkod, molupyo sa nahisgutang lugar nakuhaan og usa ka .45 nga kalibre sa pistola, ug .38 kalibre nga revolver nga pulos kargado og mga buhing bala sulod sa magazine ug tambor niini.
Si Yap kinsa nadestino sa SRP gidakop ra usab sa iyang kauban human siya mamatikdi nga nagtangkil og armas de fuego ug gitunol usab dayon ang maong mga armas ngadto sa kapolisan sa Mambaling Police station.
Si Yap nagkanayon nga nagdala siya og armas isip self defense ug dili aron ipamusil og tawo. Matud ni Yap nga nasuko ang iyang mga kaubang BIN human siya makadakop og kawatan nga suod nga higala sa iyang mga kauban kansang ngalan iyang gipugngan.
Si Yap mag-atubang og kasong illegal possession of firearms and ammunition ug kalapasan sa gipatumang gun ban. Ang Special Gun ban gipatuman dinhi sa siyudad sa Sugbo,Mandaue,Talisay ug Lapulapu sugod niadtong Enero 7 ug matapos karong Enero 21 tungod sa kapistahan ni Sr. Sto Niño ugmang adlawa. (BANAT NEWS)