CEBU, Philippines - Gitumbok ni Assistant City Prosecutor Mary Ann Castro nga ang mga prosecutor nga bag-ohay lang gitugotan nga makahupot og armas, may exemption sa gun ban.
Matud pa ni Castro sa interview sa Banat News nga ang nahisgutang exemption nahilakip sa napirmahang kasabotan tali ni Philippine National Police (PNP) Chief Raul Bacalso ug sa mga opisyal sa Department of Justice (DOJ).
Sigun pa ni Castro nga exempted sila sa COMELEC gun ban nga sagad ipatuman sa dili pa, ug hangtod sa pagkahuman sa election.
Hinuon wala maklaro sa naasoy nga piskal kun exempted ba usab ang mga prosecutor sa gipatuman nga 15 ka adlaw nga gun ban sa siyudad sa Sugbo ug sa Metro Cebu area tungod sa ipahigayon nga Sinulog Festival ugma.
Nasayran nga ang mga public prosecutor gitugotan nga makadala og armas isip depensa sa ilang kaugalingon gikan sa mga hulga sa kinabuhi tungod sa ka komplikado sa ilang trabaho sama sa kahimtang sa mga huwes.
Usa sa nanghingusog nga mahatagan sila sa maong prebelihiyo dinhi sa Sugbo mao si piskal Castro ug ang mga city prosecutor sa siyudad sa Sugbo. (BANAT NEWS)