CEBU, Philippines - Ang konseho sa dakbayan sa Talisay miila sa tulo ka mga sakop sa konseho sa dakbayan nga maoy topnotcher sa pagduso og resolusyon sa milabay’ng tuig 2010.
Sila mao si Konsehal Rodolfo Cabigas, Bise Mayor Alan Bucao, ug konsehal Celiapo Cabuenas.
Si Cabigas mipasar og 39 ka mga resolusyon ug tulo ka ordinansa, Bucao 18 ka resolusyon ug duha ka mga ordinansa, ug Cabuenas, 15 ka resolusyon, walay ordinansa.
Ang apo ni Kongresista Eduardo Gullas nga si Eduardo Gullas III mipasar og walo ka resolusyon ug walay ordinansa, samtang sila Konsehal Choy Aznar ug Bernard Odilao mipasar og tag walo ka ordinansa ang usa ug usa ug tagsa ka resolusyon.
Si Konsehal Dennis Basillote, may upat ka resolusyon ug usa ka ordinansa, sila si konsehal Romeo Villarante ug ex- officio member sa konseho Osmundo Manreal kinsa maoy presidente sa Association of Barangay Captains pulos mipasar og tag-tulo ka resolusyon, apan walay ordinansa.
Si Konsehal Danny Caballero ug Konsehal Edward Alesna , tag-usa ka resolusyon, samtang si konsehal Val Ylanan walay napasar nga resolusyon.
Ang bag-ong napiling presidente sa ABC nga si kapitan Charles Basillote sa Dumlog ,ang presidente sa SK Federation April Cabigas, ug ang bag-ong presidente sa SKF, Carmel John Burlas, pulos walay resolusyon. - BANAT NEWS