CEBU, Philippines - Gihangop ni Assistant City Prosecutor Mary Ann Castro ang desisyon sa Philippine National Police nga tugutan silang makadala og armas aron ilang magamit isip proteksyon sa ilang kaugalingon gikan sa mga tawo nga buot mohimo og dautan batok kanilang mga piskal.
Matud pa ni Castro ang interbyu sa Banat News pinaagi sa telepono nga iyang gihangop ang napirmahan nga Memorandum of Agreement tali sa labaw nga opisyal sa PNP ug sa Department of Justice kalabot sa maong tinguha.
Giangkon ni Casto nga dako na kaayo kini og ikatabang kanila ug sa ubang mga prosecutors nga nakadawat og hulga sa kinabuhi tungod lamang kay wala makauyon sa ilang pagpasaka og kaso ilabi na sa kasong pagpayuhot sa ilegal nga drugas.
Sigon pa ni Castro nga siya na mismo nakadawat og mga hulga sa kinabuhi tungod sa iyang trabaho. Hinuon si Sr.Supt. Louie Oppus ang deputy regional director for operations sa Police Regional Office 7 ug Firearms, Explosives Security Agency Guards Supervision-7 chief, Supt. Rex Derilo miingon nga wala pa sila makadawat og dokumento kabahin niini. (Chester Abadilla ug Edwin Ian Melecio) (BANAT NEWS)