CEBU, Philippines - Usa ka babayeng barangay kapitan sa lungsod sa Tuburan ang nagserbisyo sulod sa bilanggoan ug dili sa iyang mga konstituwente sa iyang barangay.
Si barangay Kapitan Norma Borlas sa Sumon, Tuburan ang nasublian sa pagka-kapitan sa eleksiyon niadtong Oktubre 25, 2010 nagtingkagol karon sa Cebu Provincial Detention and Rehabilitation Center.
Si Borlas gilambigit nga kunsabo sa mga rebeldeng New People’s Army nga naglihok sa bukirang barangay sa lungsod sa Tuburan.
Kini may labot sa kamatayon sa upat sa lima ka sundalong nagbase sa ilang barangay hall ang napatay dihang gisulong sa mga rebeldeng NPA pipila na ka tuig ang nakalabay.
Kini ang hinungdan nga napasanginlan si Borlas nga didto dapig sa mga rebelde. Kasong rebellion ug multiple murder ang gipasaka batok kang Borlas ug walay piyansa nga gitugot ang korte.
Si Borlas gidakop human siya nakasang-at sa certificate of candidacy sa buhatan sa Commission on Elections sa Tuburan niadtong Oktubre 12, 2010. Wala makapangampanya si Borlas apan nidaug kini atol sa eleksiyon.
Nasayran nga si Borlas gitugutan sa korte nga makagawas og usa ka adlaw aron makapanumpa sa katungdanan sa hinapos nga bahin sa buwan sa Nobiyembre. - Gregg M. Rubio (BANAT NEWS)