CEBU, Philippines - Maayong pagkapusa sa usa ka 6-anyos nga bata human kini malatayi sa ligid sa usa ka 6-wheeler truck pasado alas-10 sa buntag kagahapon sa national highway barangay Poblacion lungsod sa Tabuelan.
Ang biktima nailhan nga si Joem Galo Abasolo, 6, molupyo usab sa maong lugar kinsa dead on arrival na pag-abot sa Sogod District Hospital. Sa pakighinabi sa Banat News ni PO3 Adolfo Ballovar sa Tabuelan Police Station kini mibutyag nga ang biktima uban sa iyang magulang nagduwa daplin sa karsada.
Apan kalit lang kini nga nadakin-as ug napunta sa karsada ug naatlan nga miagi ang Isuzu Elf nga gimaneho ni Angelino Sequillo Jr., 20, molupyo usab sa maong lungsod. Sumala pa ni Ballovar napasok sa pangulahiang ligid ang biktima ug naligsan sa maong trak hinungdan sa grabing kadaot nga naangkon sa lawas sa bata.
Si Sequillo gidakop sa kapolisan ug nasuta usab nga student permit ra ang gigamit niining lisensya. (BANAT NEWS)