CEBU, Philippines - Gitakdang iduso sa Department of Interior and Local Government (DILG)-7 ngadto kang Kalihim Jessie Robredo ang resulta sa fact finding investigation sa pasangil batok kang Mayor Ricky Ramirez sa Medellin kinsa gipasanginlang mipusil patay sa usa ka kawani sa munisipyo nga si Edelberto Abao.
Matud ni Regional Director Pedro Noval sa DILG 7 nga gipaabot karong Lunes sa sunod semana nga mahingpit na ang linain nilang pakisusi nga iduso nila ngadto kang Secretary Robredo lakip ang tanang mahipos nilang impormasyon sa kaso.
Dugang ni Noval nga niadtong miaging adlaw siya ug ang iyang mga kawani personal nga miduaw didto sa lungsod sa Medellin ug nakigtagbo kang Mayor Ramirez.
Gikan kang Ramirez, nakigtagbo usab sila sa pamilya sa biktima aron pagkuha og dugang kasayoran sa maong hitabo.
Gipasalig hinuon ni Noval nga dili maka-apektar sa nagpadayong imbistigasyon sa kapolisan sa maong kaso ang gihimo nilang linaing pakisusi ug gani makatabang pa kini sa maong imbistigasyon.
Matud ni Noval ang mga impormasyon nga ilang mahipos sa maong pakisusi makatabang kaayo ilabina na sa lakang nga angay himoon sa gobyerno batok niadtong mga opisyal nalambigit sa kontrobersya.
Nasayran nga si Mayor Ramirez maoy gitumbok nga suspek sa pagpusil patay kang Abao sa nagpadayong imbistigasyon nga gihimo sa Criminal Investigation and Detection Group (CIDG)-7. (BANAT NEWS)