CEBU, Philippines - Nasikop atol sa gipahigayon nga buy bust operation kagahapon sa Lapu-Lapu City Police Station ang tulo ka mga lalaki sa managlahing lugar sa maong dakbayan.
Ang maong buy bust operation nga gipangulohan ni PO3 Jomar Ybanez maoy hinungdan sa pagkasikop sa tulo ka mga suspetsado.
Usa ka Gregorio Taghoy, 50 anyos, mulopyo sa Barangay Maribago sa maong siyudad, ang gidakop diha-diha dayon human mitunol og usa ka paketi ngadto sa asset sa kapolisan, nakuha usab gikan kang Taghoy ang laing lima ka mga gagmay’ng paketi sa shabu, P310 nga halin, ug P200 nga buy bust money.
Samtang nasakmit usab sa Intelligence Section atol sa ilang surveillance si Ralf Obidiente, 24, taga Mahayahay Bangkal, dakbayan sa Lapu-Lapu diin nakuhaan kini lima ka pakite nga shabu.
Dominador Alindajao, 40, taga Barangay Maribago siyudad sa Lapu-Lapu nga nakuhaan og pito ka mga paketi nga shabu dihang naatlan sa akto ang duha nga nagkompara sa gidaghanon sa mga drugas nga ila untang ibaligya.
Matod sa kapolisan nga adunay mitawag sa ilang estasyon nga usa ka concerned citizen ang nagpahibawo nga kusog ang binaligya-ay og illegal nga drugas sa maong dapit hinungdan nga nihimo dayon sila og lakang batok niini.
Nagtingkagol na karon sa prisohan ang tulo ka mga suspetsado ug kasong paglapas sa Republic Act 9165 o Dangerous Drug Act ang atubangon sa mga suspetsado. - Reina Vita S. Labang ug Maria Ana Carmela Estenor (BANAT NEWS)