CEBU, Philippines - Mikabat sa 21 ka mga tawo lakip na niini ang tulo ka tuig nga batang lalaki ang naangol human ang bus nga ilang gisakyan midasmag sa punoan sa Gemelina niadtong Martes sa buntag sa sitio Abante, barangay Bongon, lungsod sa Tabuelan.
Hinuon matud ni PO2 Winston Ybañez nga dili grabe ang mga bun-og ug pangos nga naangkon sa mga pasahero kinsa daling gidala ngadto sa Tabuelan District Hospital.
Ang tulo ka tuig nga batang lalaki mao si Adrian Ypil taga barangay Poblacion sa nahisgutang lungsod.
Matud ni Ybañez nga ang 42- seater nga Pesiao Bus Liner nga nagtangag sa plakang GWF-759 gimaneho ni Virgelio Lanterna, 44, taga barangay Poblacion, lungsod sa Tuburan.
Ang maong bus gipanag-iya sa bise mayor sa lungsod nga si Dominador Pesiao.
Ang nahisgutang bus nagbiyahe kini gikan sa north bus terminal sa dakbayan sa Sugbo paingon ngadto sa Tabuelan dihang sa pag-abot niini sa nahisgutang lugar kalit lang naputol ang tire rod link nga maoy magkontrolar sa manobela. .
Gihulagway ni Ybañez nga ang maong lugar dulhogon ug maayo gani kay pagkabangga sa bus sa punoan sa kahoy nasangit ang sakyanan ug wala na makalahos ngadto sa ubos.
Si Ybañez midugang nga ang mga pasahero sa bus dili interesado nga mopasaka og kaso batok sa drayber tungod kay giabaga man sa tag-iya sa bus ang ilang mga galastohan sa tambalanan. - BANAT NEWS