CEBU, Philippines - Tungod sa tumang kamingaw sa iyahang asawa nga upat ka tuig nang namatay nakahukom ang usa ka mag-uuma sa pagpakamatay pinaagi sa paghikog og nakit-an nalang kining nagbitay nga wala nay kinabuhi didto sa Sitio Lala-an barangay Bulsa lungsod sa Argao niadtong Martes sa alas 11:10 sa gabii. Ang nagpakamatay mao si Alfredo Camarihan Sarno, 56 anyos, byudo, usa ka mag-uuma nga nagpuyo sa nahisgutang lugar.
Matod ni PO2 Benjamen Gerozaga sa Argao Police dihang nahinabi sa Banat News subay sa inisyal nga imbistigasiyon ang biktima katapusan kining nakit-an sa umagad niini nga si Juanito Sanchez didto sa baybayon nga nagpungko ug naghilak.
Dihang gipangutana kini kun unsay problema igo lang kining nitubag nga gimingaw siya sa namatay niyang asawa mga upat ka tuig kapin na ang nilabay. Pagkahuman niadto gibalik sa maong dapit ang biktima sa iyang umagad ug gitawag alang sa panihapon nianang pagka alas 8:00 na sa gabii apan walay nitubag. Apan nianang pagka alas 11:00 pasado na sa gabii nakugang nalang ang mga kabanay niini dihang ilang nakit-an pag-abli sa pultahan nga nagbitay na ang biktima sud sa kwarto niini nga patay na ug dunay higot nga liston sa sapatos ang liog ug ang pikas tomoy niini gihigot sa kahoy ubos sa ilang atop. Hinoon ang patay’ng lawas sa biktima gitakdang ipaubos sa autopsy pagtino kun wa bay foul play ang kamatayun niini.
Samtang didto sa lungsod sa Alcoy patay usab ang usa ka mananagat human kini naghikog didto sa barangay Atabay alas 7:00 sa gabii niadtong niaging adlaw. Ang nagpakamatay mao si Jesus Antalan, hingkod ang panuigon ug molopyo sa maong lugar nga usa ka mananagat.
Usa ka Joselito Amacna ang nakakita sa biktima nga nagbitay na ilawom sa puno-an sa lubi nga dunay higot nga pisi ang liog nga ang pikas tomoy gihigot sa palwa sa lubi. - BANAT NEWS