CEBU, Philippines - Mohimo og mga nagkadaiyang kalihokan ang kagamhanan sa dakbayan sa Mandaue nga gipahaum usab alang sa makasaysayanong pagbisita sa balaang imahen ni Senior Santo Niño karong tuiga.
Ang city treasurer sa Mandaue nga si Regal Oliva mibutyag sa mga tigbalita gipangandaman nila karon ang pagbisita sa imahen sa dakbayan kay gituohan nila nga mao kini maghatag og debuenas sa Mandaue.
Ang mga dautang mapuo sama sa mga kriminal nga naglakip sa mga tulisan, manglulugos, kawatan, mangingilad ug uban pang mga dautang tawo.
Busa pipila sa gihan-ay nilang pagpangandam mao ang pagpasiugda sa ikaupat katuig nga bibingkahan nga iladlad sa nagkadaiyang stall.
Anha kini ipahimutang sa atubangan sa city hall ug makita ang nagkadaiyang matang sa mga baligya nga lumad nga pagkaon nga mapalit sa katawhan sa makatarunganong presyo.
Ang maong mga lumad nga kalan-on sa dakbayan nga ibaligya gawas sa nabantog na nga bibingka sa Mandaue, maglakip sa ginganlang tagaktak, masareal, budbod, biko, ug uban pa.
Si Clark Pelaez nga maoy chairman sa committee on photo contest nga ipahigayon sa pagsugat sa birhen, mipadayag nga ang mga hulagway nga ilang dawaton mao kadtong may labot sa mga kalihokan sa pagbisita sa imahen ni Senior Santo Niño sa dakbayan.
Gitataw ni Pelaez nga dagkong ganti ang madawat sa mananaug sa indigay nga itunol unya ni Mayor Jonas Cortes atol sa awarding ceremony.
Dugang pa niya nga ang laing kalihokan nga mahimo usab nga kakuhaan og mga hulagway mao ang pagahimoon nga procession tinuig nga kalihokan sa Sagrada Pamilya.
Kini sa dihang nagkatagbo ang mga imahen nila Senior Santo Niño, Senior San Jose ug ang Mahal nga Birhen Maria nga nagpakita sa ilang pagkasuod nga managhigala nga giabibahan sa mga relihiyusong Katoliko sa dakbayan. (BANAT NEWS)