CEBU, Philippines - Nasikop ang duha sa tulo ka armadong mga lalaki nga gituohang mga tulisan nga nakigpinusilay sa mga pulis human sa ginukdanay kagahapon pasado ala-una sa kaadlawon.
Gitanggong sa Fuente Police station mao sila si Rolando Inting, 30, ug Fedelino Magdaluyo, 22, pulos taga barangay Ibabao lungsod sa Cordova, samtang ang nakaikyas giila lang sa angga nga “NJ” nga taga Gun-ob sa dakbayan sa Lapulapu.
Ang ginukdanay nagsugod sa Mango Square sa Mango Avenue hangtud na sa may Martinez compound sa barangay Camputhaw, siyudad sa Sugbu.
Wala hinuoy nangaigo sa habig sa kapulisan ug sa mga suspek sa sinukliay sa bala apan milampos gyud ang mga sakop sa Mobile Patrol Group (MPG) sa pagdakop sa duha nga naghuot og angkasay sa motorsiklong kolor itom nga nagtangag sa temporaryong plaka nga 7TC-I-3085.
Ang Car 016 nga gisakyan ni SPO3 Joel Añonuevo maoy unang migukod sa tulo dihang ila kining gisita sa Mango Square apan kalit lang mipahulbot padagan hinungdan nahitabo ang ginukdanay.
Pag-abot sa Martinez compound giingong mibunot og armas si Inting ug mipusil sa mga polis ug didto na nagsugod ang sinukliay sa bala apan suwerteng walay nangaigo.
Apan natumba sa gisakyang motorsiklo nila si Inting hinungdan nga nagkatibulaag og panagan apan naapsan sa mga residente ug gitabangan og kulata ang mga nadakpan.
Si Inting nakuhaan sa kapulisan sa iyang posesyon og usa ka .38 revolver ug dunay mga buhing bala sulod sa tambor niini.
Ang kapulisan mopahigayon og background check nila batok sa tulo sanglit nagtuo silang mga tulisan ug nalambigit kini sa pagpanulis nga nahitabo matag kaadlawon sa mga pasahero sa PUJ.
Si Inting mihimakak nga sila mga tulisan ug labaw sa tanan iyang gipanghimakak nga iya ang maong armas nga nakuha sa kapulisan, matud pa niya nga naratol siya niadtong higayona kay wala niya madala ang iyang lisensya hinungdan nga nagpabulhot siya sa pagpadagan sa motorsiklo.
Si Inting nagkanayon nga gikan sila sa Cabancalan nagkuha sa cellphone ug paingon unta sila sa Colon apan gisita sila sa mga pulis human kadudahan ang ilang linihokan. (BANAT NEWS)