CEBU, Philippines - Duha ka tawo kinsa giingong mga hubog, nangaangol dihang mibangga sa semento nga pader sa eskuwelahan ang motorsiklo nga gisakyan nila didto sa barangay La Purisema Conception sa lungsod sa Bogo kagahapon sa alas 6:25 sa buntag.
Ang mga biktima mao ang drayber sa motorsiklo nga si Arnel Pepito Sebiel, 27, minyo, nga taga Purok 6, sitio San Miguel, sa barangay Apas ning siyudad sa Sugbo, ug ang angkas niini nga si George Rebado Ahungan, 22 , ulitawo, nga taga barangay Pajo, lungsod sa Daanbantayan.
Si SPO2 Rogel Layson sa Bogo Police Station mibutyag sa Banat News nga ang mga biktima kinsa giingong mga lasbag gikang nag-inom nga nagpadagan sa ilang motorsiklo.
Pag-abot niini sa kurbadang bahin sa karsada sa maong lugar nawad-an sa control ang nagmaneho sa motorsiklo busa midasmag ang ilang sakyanan sa sementong pader sa Saint Louise Learning School sa maong lugar.
Gihulagway nga nabalian og mga bukog ang drayber ug ang angkas niini kinsa pulos nalandig didto sa Verallo District Hospital sa Bogo apan gi-transfer usab dayon sila sa tambalanan sa dakbayan sa Sugbo.
Samtang ang motorsiklo sa mga biktima gihulagway nga puwerting pagkagusbata. (BANAT NEWS)